’22 बरस’ के छत्तीसगढ़ : सड़क से लेकर अस्पताल के साथ बदलिस स्कूल के हालत, बिजली, पानी के समस्या होईस दूर, पढ़ा 22 साल म कतेक अईस हमर राज्य म बदलाव

प्रमोद मिश्रा

रायपुर, 01 नवंबर 2022

आज एक नवंबर के दिन हमर राज्य के स्थापना दिवस हरे । ये दिन छत्तीसगढ़ के लोगन मन बर काफी खास हावे, काबर के आज ही के दिन छत्तीसगढ़ राज्य के निर्माण होए रहीस हावे, अऊ एकरे साथ विकास के नवा अध्याय के शुरुआत भी होय रहीस हावे । ये 22 बरस म राज्य म स्कूल से लेके अस्पताल, पानी से लेके बिजली अउ गांव से लेके शहर के अब्बड़ विकास देखे बर मिलिसे । छत्तीसगढ़ के लोगन मन ल अभी भी आस हे कि जे हिसाब से समय आगे बढ़त जाहि, उसने हिसाब से ओमन के विकास के रफ्तार भी आगे बढ़त जाहि ।

छत्तीसगढ़ के जब 01 नवंबर 2000 म निर्माण होईस, तब स्कूल, अस्पताल,सड़क,पानी,बिजली सबके समस्या रहिस । लेकिन, आज ये समस्या बहुत हद तक दूर होगे हे । 22 बरस म तीन मुख्यमंत्री छत्तीसगढ़ ल मिलिस । अउ तीनों मुख्यमंत्री मन हमर राज्य ल आगे ले जाये म बड़का योगदान दिस ।

तीनों मुख्यमंत्री के कइसे रहिस कार्यकाल?

सबले पहली मुख्यमंत्री बनिस अजीत प्रमोद कुमार जोगी । अजीत प्रमोद कुमार जोगी काफी विद्वान किसम के आदमी माने जाए । अजीत जोगी इंजीनियर से लेके कलेक्टर भी रहिस । 29 अप्रैल सन 1946 म जन्में अजीत जोगी ह 01 नवंबर 2000 को मुख्यमंत्री पद के शपथ लिस अउ छत्तीसगढ़ के विकास म अपन खासा योगदान भी दिस । साल 2000 से लेकर 2003 तक मुख्यमंत्री पद म रहिस । लेकिन, 2003 चुनाव म कांग्रेस पार्टी ल हार के सामने करे बर पडिस अउ जोगी के मुख्यमंत्री के कुर्सी चल दिस । अजीत प्रमोद कुमार जोगी ल छत्तीसगढ़ राजनीति के जादूगर भी कहा जाये । सन 2016 म कांग्रेस छोड़के नया पार्टी के निर्माण करिस । 74 साल के उमर म 29 मई 2020 के दुनिया ल अलविदा कह दिस ।

सन 2003 के राज्य बने के बाद पहली विधानसभा चुनाव म बीजेपी पार्टी के जीत होईस अउ मुख्यमंत्री के तौर म डॉ रमन सिंह ल कमान मिलिस । चाउर वाले बाबा के नाम से लोगन मन के बीच नाम बनाय वाला डॉ रमन सिंह तीन बार लगतार मुख्यमंत्री बनिस । मुख्यमंत्री के तौर पर डॉ रमन सिंह के कार्यकाल म छत्तीसगढ़ म एम्स, आईआईआईएम, आईआईआईटी, एनआईटी, जैसे बड़े संस्था के निर्माण होईस साथ ही बिजली से लेकर सड़क अउ स्कूल मनके भी विकास होईस । 2018 के विधानसभा चुनाव म बीजेपी के करारी हार होईस अउ मुख्यमंत्री के कुर्सी से डॉ रमन सिंह के बिदाई होगे ।

2018 के विधानसभा चुनाव म कांग्रेस पार्टी ल बड़का जीत दिलाय म अहम योगदान निभाने वाला भूपेश बघेल ल विधायक दल अपन नेता चुनिस अउ 17 दिसंबर 2018 के मुख्यमंत्री के तौर म शपथ लिस । अपन छत्तीसगढ़िया बोल चाल अउ संस्कृति ल आगे बढ़ाए के काम भूपेश बघेल करत हे । मुख्यमंत्री के तौर पर जइसे ही भूपेश बघेल शपथ लिस ओकर 1 घण्टा के भीतर म ही किसान मन के कर्जा माफ करिस अउ 2500 रुपया प्रति क्विंटल म किसान मन के धान लेहे के घोषणा करिस । किसान मन के बीच अपन खास पहचान बनाने वाला मुख्यमंत्री भूपेश बघेल अपन ठेठ छत्तीसगढ़िया व्यवहार के नाम से जाने जाथे । भूपेश बघेल अपन शासनकाल म अभी तक स्कूल के क्षेत्र म सरकारी इंग्लिश मीडियम स्कूल, सरकारी हिंदी मीडियम स्कूल के जीर्णोद्धार के साथ घर-घर ईलाज के व्यवस्था अउ किसान मन के साथ भूमिहीन लोगन म फायदा पहुंचाए बर सफल रहिस । गाय मन के विशेष ख्याल रखत गोठान अउ गाय मन के बेहतर उपचार के साथ गौमूत्र अउ गोबर ल खरीदे के काम करिस । आदिवासी संस्कृति ल विश्व पटल म लाय बार अंतर्राष्ट्रीय आदिवासी नृत्य महोत्सव के शुरुआत करे गिस । युवा मन के नौकरी बर परीक्षा दिलाए वाला फीस ल भी माफ करे के घोषणा करिस । फिलहाल, अभी भूपेश बघेल ह राज्य के कमान ल संभाले हावे ।

22 बरस के छत्तीसगढ़ के इतिहास म अतका जरूर कहे जा सकत हे कि छत्तीसगढ़ के गांव से लेकर शहर तक विकास काफी होय हावे, अउ गांव ह भी अब शहर के साथ कंधा से कंधा मिलाके चल सकत हावे । उम्मीद अउ विश्वास हे कि आने वाला दिन म छत्तीसगढ़ के अउ ज्यादा विकास होही अउ छत्तीसगढ़ के नाम विदेश म ‘सबले सुग्घर और स्वच्छ राज्य’ के रूप म होही ।